الخروج اشبه بسكه ..


في اجتيازها الكل عاجز .. 


شبر واحد تمشي خطوه ..


و شبر تاني رجوع لحاجز !

زار نوفمبر غطي ارضك بالسيول .!


شوف غرقنا في شبر ميه ..


المخيف شوف الطريف ..


ادي ازمه باكتمالها قالوا هي الأولويه ..


كله دا علشان نحاول نمشي خطوه ع الرصيف !.

مين اللي يثبت انك انتي امنا ..


و انتي اللي بينا بتبتدي في الكل ضرب ..


مسحول و كفيان م الوجع يشهد علينا جلدنا ..


لكن بنبقي واجهتك لما الطريق بياخدنا حرب !!

الارض سرقت م الصبيه شباب ..


و الحق عاجز في الكشف عن رأيه ..


و مكلبشينه كل يوم في الباب ..


مفتاحه قدامه و مش لاقيه !!


ياريت تقولوا للي قاتلينه حرام ..

الضحكه مبتغزلش بدله الاعدام "!

اللي اشتكي مالقاش علاج يداويه ،

غير بس جرعه تحركه لقدام !.

لقيتك في الوجع دمعه ، وشوفتك في الفرح زينه .!


عشان الدنيا مش حاله ، لا يمكن تفضلي حزينه .!

احتمال الحب يقتل كل نظره يسيبها عاشق في الفراق .. 


و احتمال الضحكه تحيي قلب مغلوب في البكاء ..


كل قلب في بدايته ابيض و اما يحزن فجأه لونه يبقي داكن ،


زي مثلا جسم كائن عاش حياته في الإستواء !!

في احتياج للثوره تاني .


قبل تأبين المياتم ..


النظام جاي لنهايته ..


لما ساب للشعب حاتم !

عين البشر بتقول ..

إن انتى حوريه ..

و إن الجمال هيزول ..

لو إنتى مش هى !!

يا اول حلم كان ليا ...

بحبك ليه محبتنيش ..

ايه الموضوع ..

معقوله تموت ..

و تسيبنى اعييش !!

و لا حد هيفهم اوجاعك ..

و لا حضن ان ساع هيساعك ..

الدنيا ان عرفت تديلك ..

اديلها على قد حاجتها ..

و اديلك افراح تحييك ..

فى اللعب متسيبش الفرصه ..

علشان الجاى هيمحيك !

لقمه واحده تسد جوعك ..

و ازاى هتكفى وطن بحاله ..

شايفين ضحايا ..

فى كل ركن فى الصراع ..

شايفين قلوب ..

انتشوا فى زمن الخداع ..

زعقولهم واتبعوهم ..

وانتوا رافعين اغلى رايه !!

سيبوا المقاسى وكملوا ..

سيبوا الغنايم .. واكتبوا على الحيطان ..

اسامى القرايب و الرفاق ..

وازكروا فى كل ركن ف الميدان ..

وعرفوهم ان الميدان صان الولاء ..

واما تلقوهم فى مشهد الاعاده ..

عيطوا .. واتندموا و بلغوهم بالكلاب ..

اللى خون واللى ساب

و اللى حرض واللى غاب ..

واللى عرض للبياده !!

هم دى مصر يا ساده !!

اغرب نهايه فى الكتاب !!

جيشنا محتاج المدد

قبل ما يجتاحه العبيد

مين اللى مجد ف الكلاب

يا طلقه نارها راح تزيد

الثوره مخرج للحياه

وانا لسه جايلك بالعدد ..

مين اللى غير فى التاريخ

مين اللى حددلك تمن ..

اه مـ الزمن ..

صان الخسيس .. رفع الرخيص ..

اجزم بان غنوتك نورها ظلام ..

و انا لسه جاايلك صقفى

متوقفيش .. ومتيأسيش

الياس عمره ما كان خروج م المعضله

كل اللى خايف قال هعيش

ملعون ابوها الاسئله

بنت الحرام

اللعب ع المكسب فحاذر لا مفر ..

الرهبه طُعم الانتقام ..

قبضه ميدانك كف ايدك وانت حر  ..

يناير عز الشتا و ثوران المسام

ثورتين مع بعض  ..

متوحدين من البدايه ..

للنهايه بالتمام

الارتعاش و التكتكه من االبرود

اعلى سطوات للعلم و الرايات

اشتداد المعركه مع اقتراب صوت البارود

الدم مرشوش فى السكك

الخرطوش بيحضن اللى انتفض بشويش

سموا اللى خانوا من شرطه أو من جيش

البيان قسمنا و ظهرت الفرق

و النظام من ضعف حيلته

قادم على الغرق

الانهيار على المحك

و اللى جاى ملوش وضوح

من فراغ العينه

عدت سنه وراها سنه

و بقينا نكدب على بعضنا

و اللى هيكسب صعب

يحسب الغنايم

هل يا افاضل لسه فاضل

على الهدف مشوار طويل

و لا اللى ماتوا لاجلنا

هنيع راياتهم

و هتننتظر وطن بديل

الدير عطشان علشان الراعى نشّف ريقه ..

و سحاب المطره نِزل ع الفاضى ..

ترانيم بتوفق الدوران على ليل شبرا ..

ازاى بيكون حب الماضى ..

زى الاوبريت جوا الاوبرا ..

الاخ كوهين اخر حاخام جوا الحاره ..

حَتّم على قَفل تراث جِدّه ..

مبقاش بييبع فى الخَماره ..

واهو صَمم جدا على هَدّه ..

وادى مينا قبل الفجريه ..

بيصحى محمد من الاحلام ..

هعملك حبّه تسقيه ..

و ياعم بعُوده الايام ..

متهز الطول علشان تتسحر ..

كان مَشهد يشهد بالالُفه ..

وبإن الفِكر فى هذا الوقت ..

لا يمكن ابدا يتأخر ..

لكن دلوقت .. يا خساره ..

سرعان ما السيره بتتبخر !!

بنحلم ونحلم وفجأه نفوق ,,

مجرد دقايق فـ حضن المنام ,,

طلعنا غلابا بنشقى فـ سوق ,,

كسبنا خسرنا ياسيدى تمام ..

ماهى الفرص أكيد مش بالمزاج ..

بتيجى علينا فـ وقت انشغال ..

ياريتنا وعينا فـ روح الطفوله ..

ياريتنا فضلنا شويه عيال ..

بتتهجى عربى جنب الحساب ..

وترسم قلوب فـ جلد الكتاب ..

وتهتف هتاف يرج الطابور ..

ونرفع رؤسنا فـ حب العلم ..

نفرح عموم السياده الحضور ..

ونكتب نصيحه بحبر القلم ...

نشخبط و نكتب فـ صفحه جديده ..

نتيجه للاننا سيبنا الرصاص ..

فنزهق محاولات وناخد بريك ..

واقولك يا صاحبى حلوه وخلاص ..

فنرسم حكايه فـ قلب التاريخ ..

ونسكت فـ وقت رفع الادان ..

نروّح لبيتنا .. فننسى المكان ..

فنرجع ليوم اللى جايب تاليه ..

فتحضنا اقصى درجه أمان ..

فنحمى اللى جاذب قلوبنا إليه ..

ف وقت امتحانا نبرشم سوا ..

لحد الاجازه يطير فـ الهوا ,,

نقصى الاجازه نادى و Pes ..

و كوره تِضَيق علينا الخميس ..

ووقت تقدم عالمنا المزيف ..

بقالك يا حلو تويتر و فيس ..

ياريت اللى جاى .. ياريته بلاش ..

ياريت اللى فات .. يعود للعقول ..

ياريت اللى مات ,, يطل علينا ..

فنسرح معاه .. فـ وقت الزهول ..

ياريت كل حاجه بتفضل بحالها ..

فننسى معاها تملى السواد ..

ياريت الروايح بتحفظ مكانها ..

تهوّن علينا آلام البعاد ..

عفويه الضحكه اللى بتطلع ..

من غير ترتيب مسبق ليها ..

و انا نفسى تفضلى فرحانه ..

علشان اضحكلك بعديها ..

و ان سألت روحك عن عله ..

جاوبيها بدور طفله بريئه ..

و ان لزم الكلمه المدروسه ..

فخديها لذات اى طريقه ..

و اسرحى وياها انشاله سنين ..

بس متنسيش الا الازمات ..

خدتى الاحزان ؟!

طبعا طبعا ...

عيشتى الافراح ؟!

اسعد لحظات ..

عديتى السكه بتضاريسها ؟

يمكن عديت على ضهر الليل ..

غنيتى اللحن اللى لعبناه

على وتر العود ..

شجن المواويل ...

مين صبره و طوله و تنهيدته ..

مالكاه الان رغبه ملحه علشان هيعود !!

مضمون الدنيا فى أحداثها ..

إن جابت خير إن جابت شر ..

إوعاك تتغر .. علشان حوا ,,

الكسر اللى هيحصل فيها ..

هيبان بسهوله علشان جوا ,,

الضلع أساساً مش ملكك ,,

علشان حكمه ربنا للخلق ..

تطلع حوا ,, تبقى رفيقه ..

مش لعبه عشان تلعب بيها ..

و اهى حيله توّنس فى الضيقه !!

البنت ملاك و طهور للنفس ..

مش نظره عين ,, و لا شهوه نفس ..

البنت إتخلقت عشان تبقوا ..

قطبين للبيت ,, لو غاب القطب عن التانى ..

هيسبب جرح شديد و غويط !!

معقوله مصصم تتغابى و تعيش مع نفسك

وحدانى !!

طب راجع نفسك  م الاول

احسن م تعيش وانت اناني..

الدوله بتسقي عطشها بدم الناس ..

و الناس بتلاقي عطشها في قهر الدوله ..

بص هناك أدي خامس واحد في المشهد ..

راح في الرجلين ..

و احنا في تأبينه لمؤاخذه ..

هنظم وقفه علي الفيس ..

و هنرفع بوست اهو يبكي يومين .. بعديها نسك علي الزيطه..

و نعيد و نزيد .. نشجب و ندين .. طب في الحالتين ..

راح تصفي لايه .. دا دماغنا هتخبط في الحيطه ..

يا سعاده البيه ..

بيان :-

جاري التحقيق في السر علشان نوصل للجانى ..

من غير تلفيق ..

و اهو عدى الوقت بدون توضيح ..

كتبوا التصريح ..

على ان الحاله بتبين ضربه عربيه ..

و هنسكت بالزوق بالعافيه ترسيخا لقانون الدوله ..

و الحر هيتكلم يدن و اهو حظه راساه علمالطه ..

و نقول للبيه بتوه ليه .. ما ف ايدك امر الضبطيه ..

فيرد يقول شكلك مهزوز من لعب الطاوله ..

و احنا يا ولداه امرنا لله .. في وسطنا لا لينا و لا حول .. و الكرسي رخيص هخلوه مقاوله ..

و في جوله تعقبها اعاده .. و الريس فوق السجاده .. وسط الحراس ..

خايف علي قيمته فالجامع .. مع ان دا وقته لله ..

و علي استحياء .. ممكن تلقاه .. لمحك بتزعق قام سامع ..

في المشهد صوره و مقصوره .. خرطوش بيسابق عصفوره ..

و فقيد تاني تقريبا ماكس ..

الكلب اتبهدل و اتقطع ..

و انتصرت عدالتنا بسرعه .. لكن بالعكس ..

و الكلب ارتاح داخل قبره .. و اهالي الشهدا في وضع بغيض ..

 و لو وقت بعيد .. بيقاوموا اليأس .. و الصبر مطول في مواسمه ..

احداثنا واخده ع التكرار .. و الخونه ابطال في الادوار ..

اما اللي بيثبت م الثوار .. صبار و مأسآته في اسمه !!

فى الهوا عصفور

يسرح ويدور

زى التين

يفرح بغباء

و يرد حزين

العش سكن

و الخلق ضريح

شلاه يا وطن

يابو التصاريح

بنعدي براح

نلزق فى كمين

كان للانسان

حاضرات و تاريخ

مات الانسان

حاز ع التأريخ

النعى سواد

و تفوت يا زمن

يا بلاد بشاوات

سابوا الطرابيش

الجرافات اولى

من العيش

اللاه جريمه

ازاى يا شاويش

اهو ماشيه كده

يا عيون النيل

يا دموع هتجف

و السد جبان

يا حريق تفجير

عسكر اخوان

ترك و علمان

ارمن و ايران

داين مدان ..

سبتوا الغلبان

بيبع مناديل

الرحمه تجوز

يا بنى الانسان

على رايك لسه

العمر طويل

يا غريب اتفضل

فى ديارنا

مطرود يا حبيب

طب ليه التمييز

و انا قلبى حليب

اسكت يا مغفل

راح تفتى

تدابير الدوله دا

شئ مدروس

واحنا الصاحين

و انت بتغفل

ماهو اصل الصانعه

ليها طقوس

ما هو دا اللى

بيدفع

بالدولارات

اما انت

طشاش هتكلف ايه

اسفين لجنابك

تانى يا بيه

فراشاات فراشات ..

و الدنيا ربيع ...

شوفوتوا الخواجات ..

تشترى و تبيع ..

قضايانا مثيره و مهمه ..

و العين تدبحنا بنظراتها ..

والشيخ بقى كاره للعمه ..

علشان الدنيا و لزاتها ..

الحاكم يأمر بمزاجه ..

هو السيد وانت المأمور ..

مواطنا مستنى علاجه ..

يحترم الصف يلعن فالدور ..

ام الدنيا عظيمه عظيمه ..

شوفت النهضه ..

شوفت القيمه ..

شوفت قلوب الناس النابضه ..

شوفت المشهد جوا السيما ..

وسع وسع للجرنال ...

كانت مصر الجنه الاولى ..

جالها الحامى .. لكنه حرامى ..

ايوه حكومه مش مسئوله ..

عاجبك عاجبك اهلا بيك ..

انت عليك تعرف ترتيبك ..

واحنا حمايه .. وقت العزو ...

واما تخالف خليك عارف ..

اول ناس طبعا هنسيبك ..

التشجيع بقى حلو يوماتى ..

هو تريكه وجيله مفيش ..

اى كلام يتقال بعديهم ..

اعرف ان راويه حَشّيش ..

هى الثوره الحل الامثل ..

لما مبارك قال تنميه ..

و التنميه يا عينى عليهم ..

و ادى نظام صان الحراميه ..

ايوه اتفرج يالا علينا ...

بص الثوره جالها التانيه ..

احنا الشعب الحر الوسطى ..

جاب الشيخ و عزله فى ثانيه ..

حتى الشيخ كان كداب ..

قالك حامى الثوره الحره ..

و اما القصر فتحله الباب ..

قال للشعب اتفضل برا ..

حلوه اللعبه على الكسبان ..

بس رصيدها هيطلع دم ..

عشيوا انشاله يموت م الجوع ..

اصل الشعب دا طافح هم ..

مرسى و سيسى ..

سيسى و مرسى ..

ثوره دى ؟! لأها ..

يلعن ابو حكام الكلمه ..

سرقوا الحلم عشان الكرسى ..

عادى يا عم كبر بالك ..

هى بلدنا ليوم الدين ..

تظلم اخ تحط عيالك ..

علشان يبقوا من المساجين ..

هو السجن ايه غير اوضه ..

واوضه واوضه يبقى معسكر ..

احنا الشعب الحر الناصح ..

قالك يالا نسيب العسكر ..

و الاخوان عارفين الله ..

لما السلطه فى ايدهم جات ..

قالوا دا كله بشرع الله ..

وهما اساسا م الخواجات ..

لسه المشهد زى ما هو ..

لسه الثوره اوانها ما جاش ..

لسه الحاكم رمز القوه ..

واحنا الشعب ميستغناش !!

خدنى السؤال لجواب مجهول ...

سيبت الحياه وفضلت اقول ..

هصعب عليها ..

فتشت فيها ..

لقيت قلوبها مليانه غل ...

ازعل .. تفرح ..

افرح .. تتنكد ..

وعشان تتأكد ..

عقدتنى مجامله لزهور الفُل !

دون عن الكل ..

مرضيتش تسيب فرصه اخيره ..

او لوح قارب ..

او حنت يعنى بكرمها ..

و سابتلى القارب بالكامل ..

احقاقا للحق ياسيدى ..

لو كان الاولى انك هتعيش ..

لو يعنى هتتعشم فيها ..

م الصعب هتقدر تتعامل ..

يستحسن يعنى انك متجيش ..

هتدوسك بالجزمه ان عاجب ..

والعين لو تعلى ع الحاجب ..

هيجيلك هوا من صلب الريح ..

وتونس شله من المجاريح ..

وهتسكن بيت معمولك وش ..

هتروح لليأس الجوانى ..

وهتلعن فيه و تسب كتير ..

و تآمن ليه لبشر تانى ...

وانت اللى زهقت م التقصير ..

المضحكات و المبيكيات ..

دولا آيه فى عصرنا المخلوط بزيف ..

و الحقايق وقت احتياجها فى مصرنا ..

اللى مالكها و اللى هيملك رشدنا هيكون مخيف ..

بلدك صراط اى ضال .. و اى حال كان من المحال ..

واى واد ابن بلد .. زهد فى الحياه مجبرا .. و شاف حد زيه ..

بيلصم فى بروحه .. فلا جدال ..

بلدنا صبيه مهرها دلوقتى دم ..

كانت زمان عيونها تتقدر بماس .. بس خلاص ..

عسكرها دلوقتى رعاه .. و اللى حاميها فى الاصل واد جدع .. حتى بهيه فى الحياه

مستكتره ترعاه ..

بلدك حرام لو تنخدع .. فى نيلها او فى مجدها ..

مصر السياسه و الكراسى و الكوره و كلاب اى جاه !!

دول اسياد النهارده و بيشتحوا عليها الحياه ..
---
مصر الحبيبه بتشبه حبيبتى فى كهنها .. وفى محنها .. لو كانت هتاخد اغلى حاجه من ايديا ..

 لو حتى محتاجه الدفا .. او عايزه تهبش سلطانيه ..

مصر الغريبه فى ملكها و فى القضيه .. وفى الدراما و فى الغرامه وف عيون الديابه و الغلابه ..

و اللى عارضين تمثليه ..

مصر كانت اغلى حاجه .. ومين هيغلى عن بهيه !!

مصر العروبه دلوقتى غيه ..

سارحين فى المشهد .. كما الطير المهاجر من عشه ..

متشتتين كما الفوضى فى وقت الثورات .. الارض لو حنت بتميل للغريب ..

و تنفر م القريب .. حتى لو جاى بمكسرات .. برضو هتميل للغريب لو جاى بمشه ..

مشهد الريس الكبير .. الذى قد قرر .. فطاطينا ..

مشهد بيخلى الخفير .. سيد و بيتأمر علينا ..

مشهد مقارب ع الميدان .. البث ضاع و قت الاذاعه ..

اهلا بكم فى الحره .. الوحيده فى المجره اللى هتشرف ولادها .. وتزود عدد الطباعه !!

اهلا بكم يا ساده .. نرجو ان تكونوا قد استمتعوا بالمسرحيه ..

و اللى اتذكر كان تمثليه .. و مصر حلوه بس احنا مش حاسين .. احنا الشعب وفى الحقيقه عملاء مندسين !!

يا من تُشبه جليد موسكو ..

وعِطر فخم من برا ..

يا من تُشبه جحيم كابل ..

يا ريت الرحمه لو مره ..

يا من لفت بأحلامها على الخلق ..

توزع حلم باريسى ..

يهوّن يأس جيل كامل ..

يشتت كل من فكر ..

يشوف القبح و يجامل ..

يا من لمست بأطرافها ..

أراضى كتير .. يا من مرت ..

كذا مره مع النسمه بدون تأخير ..

يامن سكنت قلوب دايبه ..

كعشق العش لحضن الطير ..
,,,,,,,,,,,,,,,,,,,,,,,,,,,,,,,,,

غناكى شموخ و حريه ..

مغفل من سمع صوتك ..

ولا قالشى كتير الله ..

مغفل من رأى سكوتك ..

وفكر انه رهبه و ضعف ..

مغفل حتى فـ خياله ..

وصمتك كانلى حضن حياه ..
,,,,,,,,,,,,,,,,,,,,,,,,,,,,,,,
عموم الناس شبهوكى بالقمر ..

وانا غيرهم بشبه القمر بيكى ...

وشافوا فـ كحل عينك ليل ..

وانا شايفه حزين ضعفان ..

و مجبر يصغى لعنيكى !!
,,,,,,,,,,,,,,,,,,,,,,,,,,,,,,,
يا بنت بتشبه الجنه ..

فـ ارض بتقتل الحالمين ..

فلو كنتى أكيد منا ..

هجيلك لو طريقك فين !!

الوقت :- بعد الفجر تقريبا ..

ماشيه الصبايا ع السكك بتدندن ..

و الغيط يحاكى نفسه لحد م يوصلوا ..

حل الخبر من عند بيت البيه ..

هما الصبايا على المعود اتأخروا !!

المفاجأة :- حدث ولا حرج ..

الغيط بيكره اى حد غريب ..

و الضهر قرب يا غفير شقر ..

هما الصبايا الليله مش جايين ..

ولا السكك سمعت لغول فَقّر ..

النبت ليه اندمج مع المساكين ..

اه يا عينى ع المسكين ..

لما يغيبله قريب !!

بعد الغيبه :- الصبايا ظهروا بس المزاج عادى ..

النبت نور حدانا على عكس مقدرته ..

انتوا سلمتوا السكك .. و لا اتبعتوا الديب ..

عرض عليكوا الخمره فسكرتوا !!

ردوا الصبايا العين مغفلتشى ..

بس الحياه مش دايمه بالافراح ..

فسكرنا فى الاحلام عشان مجرد وهم ..

فشربنا كل الماضى على انه شرب مباح ..

وشربنا زيير الدم .. وكانه مزيج تفاح ..

وحبيبتى بين الصبايا بتحاكى خطاويها ..

رفضت تشتت عقلها لو حتى فى الاحلام ..

و سألت ايه خلاكى متماسكه ..

قالتلى انت النور .. لما الضلام بيحل ..

وقالتلى انت اجابه ..   ف وقت ضياع الحل ..

وايدى شوقها زاد لمتعه الماسكه !!

السكه دوامه ولابد نتأكد ..

هتشيلنا زى زمان .. و لا خلاص ملت ..

السكه زى الزرع .. لو فرعها اتبل ..

و الجدره ما اتبلت .. هتموت لان الفرع ..

حل الندى منها و هى ما انذلت !!

سأل الندى مالك .. مش انتى فرحانه ..

ردت وقالت لأ .. لو جيت اووى ع الحق ..

اصل الحياه قدره و المولى جوانا !!

مستحيل الكون يلاقي ..

نجمه ماشيه زينا ..

النجوم في العالي ماشيه ..

و انتي ماشيه في حينا !.

ليبيرتادورس

 متنحنيش للموت ..
لو جالك ذليل و متكلبش ،
عادي جدا احضنه بس بثبات ..
خليه يشوفك زي وادي .. 
مماتش من لسعه لهيب الشمس ،. 
خليه يشوفك زي بيوت عرايا قاوموا .، برد المطر .، 
و كأنه سيف جليد بيقسم اساس العبارات ،.
و متنجرش لاي تنازل يجعلك عود الحطب ..
قابل بأنه يموت لحياه لا تغني في مصير البشر .. 
سكك الهزيمه تكاد تكون مرعبه .،
اكتر من المرور بإتجاه مثلث برموده ..
الانتصار صراع لطرفين اتلهوا بزج الاخر في بحور الهلاك ..
مباح تكون المخلص للمقاسي العنصريه .،
لنوع بسيط بيسمي اوطان البلاك ..
مبقوش عبيد غير بكراهيه التكبر و التعالي .. 
و تشريع ملزات النفوس من مرض الاستعمار ..
و ربط الخضوع و الانحاء بأنه السبيل الاوحد للاستقرار ..
مشاهد تصويريه من التايتانيك
الدموع ما نهالتش الا على موت البطل و فراق الحبيبه ،، المصيبه ..
فيه ناس تانين ماتوا لكن دى هوايه القلوب فى التمييز ،، امر يغيظ ..
لو بيقدروا تمن الروح .. و مبيقبلوش حاجات على نفسهم ..
و بيبيحوها لغيرهم .. زي مايكونوا متحكمين في مصيرهم ..
او علي علم بميعاد آخر نفس ..
لو كانوا داقوا الاطهاض و الاهانه ..
جايز ساعتها ايقنوا بأن البشر دول أمانه ..
فمستحيل تجبر محبي القصور بالتجربه في حضن الكهوف ..
او عسكري يقرر مصيره برغبته ..
ابدا مع انه عارف قوته ..
لكن مصيرها تسكته .. لو بالظروف .. 
القوه يمكن ساومته .. علي وضع ميليقش بصنم ..
يعيش الصنم داق القلم ..و قال يا باشا ..مش كل يوم طبطه .. 
دا الوضع محتاج ضربتك .. بكفايه لين ,,, 
اضرب بإيد من حديد .. حرص لتلقي نكبتك ..
اخطر كمين ,, 
واعرض شريط بيغطي شاشه حاشيتك .. 
و تكون سجين !!و هتتنسى ازاى وكانت مشيتك ..
و شكرت مين و ظلمت مين ..
الحر كونه في فكرته .. 
و ان ثار لا يمكن تكبته .. 
ايه يعني يتسلسل سنين .. 
غمي العينين و متغمهوش .. 
شوفه بيهزم الجيوش .. 
و اما يلاقيكوا مأبدين .. 
يحلف م يصنع نكبته .
!فمتحلفوش ..
يصرخ الليل في الشجر و ينادي ..
مين راح ينام هذه الليله و القلوب عتمه ..
و يسد اي فراغ من عامل الذكري ..
مغترب بيدور علي غريب يحضنه ..
و يكلمه عن حكايات الهلالي ..
وعن السيره و عن مسيره بن عبد الله ..
كان يا مكان كان الليل صاخب لا يشوبه عوار ..
اما النبي اطرافه شهدت تضحيات الغار ..
هذا الزمان كان الجماد فيه افقه من اعيان قريش ..
و من رموز القبائل..
و انبل من الشجعان و افصح من الشعرا ..
في عصرهم ..
اما اللي كانوا مفتحين زادوا جهل علي جهلهم ..
اما في زمانا الجهل بقي وطنيه في مصرهم .. 
افلاطون عكاشه .. سقراط موسي .. اوبرا الخياط .. 
المهنه تضليل عامه الشعب ..وزرع بذور الاحباط .. 
و التبرير للفكر المتدني ،، و ايجاد مهارات الترويج و اللعب !! ..
لو كنت خيار .. 
اكيد مكنتش هبقي اختلاف مسار دجله و الفراط مع النيل ..
مكنتش هبقي مبرر احتلال الوطن لسقوط النظام 
مكنتش هبقي رصاصه تطحن الاحلام كما تفعل الرحا بالحبوب ..
مكنتش هبقي قاضي باطل علي منصه الحق ..
مكنتش هبقي اختذال الفساد بأنه فساد مالي فقط ..
مكنتش هبقي كلام اثري من غير النقط ..
مكنتش هبقي هبقي نحس الزمالك اللي مبيتبدلش .
مكنتش هبقي ركاب الموجه و ناضلهم مع الصفاقات ..
و خلوك انت الخاين عشان مبتطبلش ..
مكنتش هبقي منتج واحد لا يقبل التغيير 
او المنافسه مكتوب عليه صنع في الصين .. 
و عشان كده بتلاقي و لاه الامر خلونا شعبين ..
و علي العكس 
كان ممكن اكون المانيا الموحده بعد سقوط جدار برلين ..
كان ممكن اكون شعب اخلاقه تشبه شعب اليابان .. 
علي عكس اخلاق المصريين ..
كان ممكن اكون صمود اهل فلسطيين وشموخ الاقصي .. 
ااه و بعدين حالنا ازاي ،،اتوحدنا ؟! 
اه اتوحدنا في شكل الرقصه .. 
علي مؤتمر اوسلوا الجاي ،،
شوف كام شهيد سلم شهيد و اتنسوا !!
شوف كام نظام فاتح بيبان محبسه !!
كون الحقيقه بتشرط ايه اللي تم .. 
وجب الحياد علي رادين الحقوق ..
الكلمه لو طلعت عاريه من الصحه ..
يا طالب الحق راح تلاقاه يوم الحساب فوق ,,
اما الكتاب ,, لو باليمين ,, فهيبقي لك طوق النجاه ,,
ان الحياه اقوى امتحان ,, واحنا طبعا طول حياتنا مبنذاكرش ,, 
الا القليل ,,لكن فى امتحانات المراحل ,, لو سبينا حرف ,, 
بنلاقي روحنا ضلت سبيل ,,احنا العجب و احنا السبب ,, 
واحنا المشاكل و الحلول ,, وعشان كده ,,,ياما دقت على الراس طبول !! 
مبارك فكره تقتل و لا تموت ..
فازاي هتمسح دمع البيوت ..
لو نزل علي فراق الحبايب او الصحاب ..
ترضاها او مترضهاش ..
كل الخلاصه اللي مات هو اللي عاش !!
وحنا فى عذاب ,,
فمتصدقش في نزول دمعي هشوف راحه ، 
انا راحتي في جنوح ظلمك علي كفه ميزان العدل ،
اما بعد : - الثوره ثارت اصلا ..
واحنا اللى عجزناها .
.قال ايه هنبنى خلاص ..
الله يكون فى العون ..
الشعب هو المخلص ..
والقتله رد سجون ..
والسجن اصلا حجه ..
واحنا الرعاع مجانين ..
صدقنا ان العدل .. 
بيعيش مع القوانين ..
يا بلد عايشين لك ,, 
صدانا ليه دايماً !!
الموت مهوش عقبه واحنا إشتهينا الموت ..
بس إحنا فضّلنا برا عشان أهوّن ,,
طب عارفه ملك الموت ,, 
لو جانى فى الرحله ..
انا كنت لملمته و سلمتله بالروح ..
يا مُر أحلاكى .. 
صَبر السفر ملكوت ..
سابني وحيد الجرح دلوقتى بحر جروح ..
ففركت مصباحه ..جالى علاء الدين ,,
زاهد كما روحى يا وهله على الصدفه ..
جالى بأمانى صعاب .. 
و نصحنى بالآتى :"" لو عايز فرح هاجر ,, 
ولو عمرك فيها طوّل ..فانا خدت بالحكمه ,, 
و همست بصوت واطى ..يا مصر م الآخر .. 
لو جايه تتمايلى لاجل الفرج قرّب .. 
مشكوره أفاضلك مـا كان من الأول ّّ !!
فيكي القريب ابعد اما البعيد اقرّب !!
و انا حق متسول !!

حرف الميم

قابل يا حرف الميم ..

اتهانت فى التقسيم ..

و اخدت طبع البؤس ..

من معظم الكلمات ..

مثلا فلان مجنون ..

مثلا شباب ممحون ..

مثلا دا رد سجون ..

و بنتجاهل اي محفز يقابلنا ..

معلش النفس اماره بالسوء ..

و بتميل للشهوات بالغلط ..

و معظمنا بيتداري ف توب الفضيله ..

و بيوعظ الموميسات ..

بس بيكون في نفسه يقضي ليله ..

و بيتمناها تصفي على بيات ..

معقوله نحكم روحنا علي افعالنا ..

و وقت النتيجه مبتعدلش ..

حتي التطبيل بقي فينا ..

بيحاوط اوحش حاجه ..

نقتل و نقول محلصش ..

نكدب و نقول اطلاقا ..

نقسي فنستني الرحمه ..

و نقول هنروح الجامع ..

مع اول جمعه هتيجي ..

فتعدي الجمعه علينا ..

و نقول اهي خيرها في غيرها ..

لا العمر هيستنينا ..

و لا حاجه بتاخد دورها ..

و تُمُر سلسله البشر المأسويه ..

الهجره اول حلقات السلسله ..

و اخرها الاعفا من الجيش ..

مبروك يا فلان ..

راح تنفد من بلد الاتران ..

هتطير في الجو ..

و تعيش مملوك ..

اهون من عيشه عقيمه و سو ..

مجبور علي الهجره هتعمل ايه ..

تقاليد الحقبه اللي لحقناها ..

مفيهاش ترفيه ..

و لا فيها فنون ..

صادق فتبقي اكيد كداب ..

عاقل فى الاخر بقى مجنون ..

مختار مفتاح على قد الباب ..

قال ايه مش طايق اى كالون !!

ضحكه بلياتشو عجوز ساخر ,,

من جيل شبان ..

كان ذنبهم ان خيالهم اوسع من خيال البلد ..

و فكرهم بيزلزل الحكام ..

ومنها تَبيّن العبث .. واقنعونا بالتاريخ ..

مع ان التاريخ بيكتبه اللى انتصر ..

و اللى انهزم مخدش حيطه من خصمه اللدود ..

جيل الميدان هو اللى علمنا الصمود ..

هو الشهيد الميّت الحى ,,

داخل محمد محمود العيون مشافتش غير طيرها ,,

مكبل حلمه في الطيران ..

لا يعمل اى شئ في الجيّ ..

و اصبح من الخُطى حيران ..

و متعلمش حتي اصَابه الوقت في الضايع ..

و محسوب ع الساعات كان امس ..

لذلك عنده حاسه لمس ..

تفرق شارى من بايع ..

و متعلمش غير من سفك حراس النظام للشعب ,, 

ومن الهمج المتكلمين بالرصاص و من آلات القتل في زِيها البشرى ..

و من احرار كسروا عين السجان فى معسكره الحربى ..

سيل الرصاص مخوفهمش ..

لكن علمهم ازاى يكنوا ساتر لبعض ..

الصرخه الخارجه من جوف الرفاق ..

اقوى من البطش و الجاني مفلس ..

حتي لو غيّر في الرداء ..

و دا عهره اقذر من بنات الليل ..

عشان بنات الليل ادركوا غلطهم ,,

و دا غلطه فالتبرير للمصلحه العامه ..

اما الموجه الطافيه ع المشهد ..

لم تملس قذاره زعيم الامه !!

و مفرقوش بين القسيس وشيخ المعهد ..

ليه يا وطن القرب منك بعد

و البعد عنك موت

عودى الهزيل

مبقاش يساع المىّ

و لا حلقى عاد قادر يطلع صوت

و لا حتى هواك بقي راحه للحىّ

متوعدنيش عشان وعدك مبيصدقش

دا كل شريف يدوق حضنك

مبيرجعش 

غير فى النعش

سلام طويل !! 

بس ياريت ترجع تانى

قبل حياتى في عمرى الجىّ

ايوه خلاص متدمعش 

دمعك مينشورش طريق

سجنه الليل

فى عز الضي

الشمس سارحه فى سواد عيونها ..

بتلضم ضيها عناقيد ..

الزينه حاجه تفتح النِفس لساعات ..

اتعملت منك فى وقت الحزن ..

ازاى انول ضلك .. 

لما بيرحل معنى الثبات ..

سكرك طعمه شجن .. 

شعرك سلاسل فكينى منها ..

فى وقت راحه .. 

خليكى فاكره الوقت حان ..

انا من زمان مبحبش اخرج ..

من تعقيداتك بالجراحه ..

انا مش بالقوه اللى فكرانى بيها ..

الضعف جايز يطيب جمود المشاعر ..

حبيتى شاعر .. 

سابلك ديوان .. 

سبتيله ايه جوا المكان ..

غير ضحكه باهته ادارى فيها ..

بحرك بيبعت ايه غير موجه شارده .

.صوتها قوى ..

 تشبه جنينه فى حضنها ..

حتى الشبه ماهوش سوى ..

فى اسكندريه الليله رحله للعيال ..

بيلفوا قلعه قايتباى ..

 وقفوا فى وش المد ..

بينادوا حد ساعتها جاى ..

سِمعوا صَداكى طرب ..

يا للعجب ..

 بيزيد من العظمه فى غُناى .. 

شكروكى فى الترحال .. 

و في عيونهم رضا ..

و قالوا بدهشه ازاى بتبقى جميله كده .!

زى القمر بيستخبى من العبث .. 

و يبث رحمه .. 

و يطمن جدع قلبه انطمس .. 

فى وسط زحمه ..

طوفتى بعشاق الشجر .. 

كام حبّه دره وقعوا بغفله من ايديهم .. 

وازاى يكون حمصك يقولو له شام ..

ضحكه لدراويش السكك .. 

سابوا البخور ..

ايش حال بقى حسن الختام ..

 لقصتك ..

كل المشاهد منالتش ذره من سكتك ..

هذا الدواء ينصح لضالين السبل ..

يا عينى لسه بيشتكوا ..

 فرط الوجع زادهم بِكوا ..

و لقيتك انتى بتضحكى .. 

على كل من خالف خليله ..

وبيمشى اعمى ف خطوته .. 

وانا كنت ثابت م البدايه ..

قولت يمكن اصله وهم ..

 و خالفت ف اللحظه اللى هىّ ..

فارقه ما بين قلبك و قلبى .. 

جيت اندهك صوتى اتنبح ..

جسمى ارتعش ازاى

 تضيع بعد السيناريو المحتمل ..

خدّرت جسمى وقولت ازهد فى سكتك ..

 قلبى امتعض 

و لعن فى عقلى الفهلوى ..

طلعت سراب .. 

بعد الليالى الممكنه ..

شفتك شتا زارنى فى عجاف ..

رِتم بدايه ضحتك وحشنى اووى ..

حفظت مَيّك مسقيتش بيه جسمى العليل ..

وطلعت اشرب من بحر مالح ..

 زادت جروحى ..

لو روحتى فين راح تروحى .. 

لو كنتى جيتى مره تانيه ..

مكنتش هصدك ... 

منا أصلى فالح .. 

انا كنت ضدك .. 

من بدايه البدايه ..

 حظى كدا طول عمره عكسى فـ كل آيه !

كوكب حنين

    معرفش ليه سَمُوكى ام .. 

يمكن عشان حضنانى ..

وانتى بتضحكى .. 

مع ان قلبك مَسكّن وجع ..

وشايله هم .. 

وانتى الاهم .. 

من اى روح ساكنه البشر .. 

فى عينيكى جنه متتوصفش .. 

والكون ده جنه حضرتك .. 

وانا قلبى مسقى محبتك ..

 الطبطبه مسك القلوب لو تنجرح .. 

مجرى الفرح .. 

فى قاموس سطوره ضحتك ..

كل المنى ..

 ارفع ايديا للسما .. 

وادعى فيسمع الاله .. 

الام ايقونه حنان ..

 لولا وجودها ..

مكنتش هقبل بالحياه !!

و المفترض دقات قلوبنا منها ..

و المفترض وقت اكتمال صلب الاجنه ..

ترقينا من قبح الغرض ..

خوفها علينا من اى سوء مالهوش شبه ..

كله الاحبه بيعشقوا فتبان فروق ..

إلا هى كامله ايدها بتتفرد ..

كوكب بيكمل بالحنين ..

امشي عليه مرعوب اووى 

فبلاقى حضن بجاذبيه ..

يرسملي ضحكه ع الجبين 

امي اللى داقت م السنين قسوه ..

امى عينيها ضحكتين ليا ..

امى الرجوله فى كاريزما النسوه

اضحكلها تضحكلي ألفيه ..

سبحان من جعل للحي روح ونس ..

بيعلقه فيه لحد الممات ..

امى اللى عاشت فيا ..

حبها اهدى الصراط ..

امى اللى عِشت فيها ..

ملحمه م التضحيات ..

و براح يساع اوسع براح ..

هي الوحيده بهمسها ..

تمحي لى سيل من الجراح ..

ساعات اطنش ساعات كتير ..

و لما اكون بحتاجلها ..

 اناديها تيجي في ثانيتين ..

شوفتوا بقي الام فين ..

و احنا فين ..

مهما كنا او نكون ..

 مهما كان او يكون ..

امي دره العينين ..

بعد دين المصطفي ..

 امي حتما احلي دين .!